Lilý Erla Adamsdóttir, 22 ára. Stundar nám í heyrnarfræði við háskólann í Örebro, Svíþjóð.

Una Guðlaug Sveinsdóttir, 22 ára. Stundar nám í ensku og frönsku við Háskóla Íslands.

Valdís Ösp Jónsdóttir, 21 árs. Stundar nám í hjúkrun við Háskólann á Akureyri.

Við útskrifuðumst allar af félagsfræðibraut Menntaskólans á Akureyri vorið 2005, með uppeldisfræði sem kjörsviðsgrein.

Lokaverkefni nemenda í uppeldisfræði í Menntaskólanum á Akureyri felst í því að gera rannsókn á einhverju sem tengist greininni. Uppeldisfræðikennarinn okkar, Dagbjört Brynja Harðardóttir, hvatti nemendur sína til þess að nýta verkefnin jafnframt í keppnina Ungir Vísindamenn. Við ákváðum að taka þátt og fórum út um víðan völl þegar við vorum að reyna að finna út hvað efni rannsóknarinnar ætti að vera. Upp komu ýmsar misgóðar hugmyndir, þar á meðal datt okkur í hug að rannsaka tengsl tónlistaruppeldis og námsárangurs, stöðu drengja í skólakerfinu, skapandi leiðir í kennslu, stöðu heyrnarlausra barna í skólakerfinu og margt fleira. Þótt þetta séu allt verðug viðfangsefni til nánari rannsóknar hlaut ekkert þeirra náð fyrir augum okkar. Loks, eftir miklar vangaveltur, kom hugmyndin um nuddgallann upp.

Algengt er að nýbakaðir eða verðandi foreldrar fari á námskeið þar sem aðaláhersla er lögð á hagnýta umhirðu barnsins, s.s. hvernig á að baða það og gefa því að borða. Okkur finnst að einnig ættu að vera í boði námskeið þar sem lögð er aðaláhersla á það að auka tengsl barna og foreldra. Um kosti ungbarnanudds í því samhengi er engum blöðum að fletta. Því væri kjörið ef boðið væri upp á slíkt námskeið samhliða hinum hefðbundnu. Það nýja sem við höfum fram að færa í þessu sambandi er nuddgallinn. Hann hvetur foreldra til að nýta sér ungbarnanudd . Í sumum tilfellum hika foreldrar við að nýta sér ungbarnanudd því þeir eru óöruggir um að gera það rétt og þeim vex í augum að brasa við það að reyna að nudda barnið og rýna í bók eða bækling um leið. Á nuddgallanum eru leiðbeiningar sem hjálpa þeim að rifja upp hvað þau hafa lært. Önnur rök sem styðja hönnun gallans eru þau að sum börn færast undan því að láta nudda sig og getur það orsakast af því að þeim finnst óþægilegt að vera nakin, eins og venjan er í ungbarnanuddi. Einnig getur börnunum orðið kalt. Það fyrrnefnda getur sérstaklega átt við um eldri börn, og gæti þessi tilhögun því komið sér vel. Einnig getur gallinn hjálpað til við að halda börnunum rólegum þar sem hugmyndin er að hafa á honum skrautlegar og skemmtilegar myndir. Það er von okkar að gallinn muni nýtast mæðrum jafnt sem feðrum. Rannsóknir hafa sýnt að feður sem skipta reglulega á börnum sínum mynda nánari tengsl við þau en feður sem gera það ekki. Það að feður og mæður nuddi börn sín reglulega er ekki bara gott fyrir líkamlega vellíðan barnsins, heldur einnig fyrir tengsl þess við foreldra sína auk þess sem þetta er ánægjuleg stund með barninu.

Tilgáta okkar var: "Hægt er að hanna fatalínu sem hjálpar foreldrum að nýta sér ungbarnanudd".

Í upphafi var mikil heimildaöflun. Þær heimildir nýttum við okkur til þess að gera stutta kynningu á ungbarnanuddi og kostum þess. Einnig bjuggum við til frumgerð af nuddgalla þar sem þrjár grunnstrokur ungbarnanudds voru settar fram. Nánari útskýringar á nuddgallanum og markmiði hans má sjá ef smellt er á tengilinn "nuddgallinn". Úrtak rannsóknarinnar var fengið í fjórum hlutum: hóparnir sem stunda svokallaða Mömmumorgna í Akureyrarkirkju og Glerárkirkju, hópur foreldra í ungbarnasundtíma og loks söfnuðum við nokkrum foreldrum saman með snjóboltaúrtaki. Kynningin var flutt fyrir hópana og gallinn kynntur þeim. Eftir það lögðum við spurningalista fyrir hópana þar sem við spurðum um fyrri reynslu þáttakenda af ungbarnanámskeiðum og hvort þeir teldu líklegt að þeir myndu nýta sér þessa vitneskju. Eftir það létum við þrjá foreldra fá frumgerð af gallanum með sér heim til reynslu. Að þremur vikum liðnum heimsóttum við hópana aftur og lögðum fyrir þá annan spurningalista þar sem spurt var hvort foreldrar hefðu nýtt sér vitneskjuna og hvort þeir höfðu þá tekið eftir einhverjum mun á barninu. Auk þess athuguðum við hvort þeir sem fengu galla með sér heim hafi frekar munað eftir strokunum en hinir sem ekki fengu galla.

Verkefnið okkar sigraði landskeppni Ungra Vísindamanna og fengum við þar með þátttökurétt í Evrópukeppni Ungra Vísindamanna sem fór fram í Moskvu 17. - 22. september 2005. Keppnin er á vegum Evrópusambandsins og var sett á laggirnar til að auka samstarf og samskipti ungra vísindamanna í álfunni. Hún er árlegur vettvangur til að sýna það besta sem nemendur fá áorkað í vísindum og vekur jafnan mikla athygli fjölmiðla og menntastofnanna. Við hlutum engin verðlaun í Evrópukeppninni, en verkefnið hlaut mikla athygli þar.