Ungbarnanudd er nudd sem er sérstaklega lagað að ungabörnum, það er samansafn af indverskum, kínverskum og sænskum nuddstrokum. Strokurnar eru þéttar og taktfastar og eiga sér allar nöfn. Öll börn kynnast nuddi fyrst í legi móður sinnar. Þar verður húðin fyrir örvun við taktbundna samdrætti og slökun legsins. Fæðingin virkar einnig sem kröftugt nudd. Það er mikil umbreyting fyrir barnið að koma úr hlýjum og öruggum móðurkviðnum, og því veitir það þeim öryggistilfinningu þegar það er nuddað. Því má líta á ungbarnanudd sem aðferð til að milda áhrif þeirrar umbreytingar sem fylgir fæðingunni. Börn eru mjög næm fyrir öllu áreiti og því sérstaklega næm fyrir stressi. Nudd er spennulosandi og kemur jafnvægi á taugakerfi líkamans. Mörg börn eru ofvirk, misþroska og með astma, en hann er oft tengur við kvíða. Auk þess að losa um spennu örvar nudd blóðrásaflæðið í vöðvum og flytur súrefni og bætiefni til heilans og annarra líkamshluta.

Margar rannsóknir hafa verið gerðar sem sýna fram á það að snerting sé manninum, og fleiri dýrum, nauðsynleg. Nudd eykur öryggistilfinningu. Í gegnum snertingu og nudd skynjum við kærleik, hlýju og velvilja og það hjálpar okkur að slaka á. Nudd stuðlar einnig að jákvæðari tengslamyndum. Í gegnum nuddið tengist barnið þeim sem nuddar það og mun þar af leiðandi eiga auðveldara með að tjá sig, auk þess sem nuddtíminn skapar öruggt og slakandi andrúmsloft. Nudd eykur mótstöðu gegn sjúkdómum og stuðlar að tilfinningaþroska sem er ekki sjálfsagður hjá öllum. Margir fullorðnir eiga erfitt með of mikla nálægð og eru snertifælnir.

Vonda K. Jump gerði rannsókn á áhrifum ungbarnanudds á öryggi geðtengsla foreldra eða umönnunaraðila og barna. Rannsóknin tók til 57 mæðra sem var skipt af handahófi í tvo hópa. Tilraunahópurinn fékk þjálfun í ungbarnanuddi og fræðslu um ungbarnaþroska en samanburðarhópurinn fékk eingöngu fræðslu um ungbarnaþroska. Báðir hópar fóru í fjórar kennslustundir, 1 klst. í senn. Mæðurnar svöruðu spurningalista fyrir námskeiðið og aftur þegar börnin þeirra náðu 12 mánaða aldri. Niðurstöðurnar leiddu í ljós að þær mæður sem nudduðu 12 mánaða gömul börn sín oftar en einu sinni í viku áttu öruggari tengsl við börn sín en þær mæður sem nudduðu börn sín sjaldnar. Einnig áttu börnin í tilraunahópnum mun öruggari tengsl en þau í samanburðarhópnum. Öryggi geðtengsla tengdist einnig kyni, systkinafjölda og aldri móður barnanna.

Gilda Rios Bernal rannsakaði áhrif nudds þrisvar í viku á ungbörn frá Chile sem höfðu sýnt af sér neikvæða tilfinningahegðun . Þau ungbörn sem voru nudduð reyndust gráta minna, sofa og aðlagast betur, slaka betur á og bæta matarvenjur sínar .

Christy Cullen, Tiffany Field, Angelica Escalona og Kristin Hartshorn rannsökuðu áhrif þess að feður nudduðu börn sín á aldrinum 3 – 14 mánaða í 15 mínútur á hverjum degi í einn mánuð. Í ljós kom að feður sem höfðu nuddað börn sín tjáðu sig frekar og sýndu meiri ánægju og hlýju þegar þeir léku við barnið sitt en feður í samanburðarhópnum.

Ungabörn þyngjast, þroskast og sofa betur ef þau eru nudduð. Rannsóknir sem gerðar voru á ungbarnanuddi, í læknaháskólanum í Miami í BNA, sýndu fram á að fyrirburar og léttburar sem voru nuddaðir daglega í nokkra mánuði sýndu miklu örari framfarir á öllum sviðum en samanburðarhópur sem fékk ekki nudd.

Ungbarnanuddarar í Sviþjóð hafa einnig sýnt fram á að ungbarnanudd getur leitt til ótrúlegra framfara á fötluðum börnum.

Í Dallas í Bandaríkjunum gerði sálfræðingurinn Ruth Rice kannanir á fyrirburum, sem voru nýkomnir heim af vökudeildinni og skipti þeim niður í tvo hópa. Í öðrum hópnum var mæðrunum falið að sjá og hugsa um ungbörnin á hefðbundinn hátt, en í samanburðarhópnum áttu mæðurnar þar að auki að nudda börnin sín daglega. Eftir fjóra mánuði höfðu börnin í seinni hópnum tekið mun hraðari framförum og þyngst hraðar.

Kannanir á móðurlegri hegðun ýmissa dýrategunda sýna, að örvun eins og að sleikja magann á meðgöngutímanum, geti haft gagnleg áhrif bæði á móður og afkvæmi. Þegar farið var að nota hólka um háls ýmissa dýrategunda, til að koma í veg fyrir að þau gætu sleikt sig, kom í ljós, að þau gátu ekki þroskað með sér þá móðurlegu hegðun, sem er nauðsynleg undirstaða fyrir líf afkvæma þeirra.

Mæður sem þjást af fæðingarþunglyndi eiga oft í vandræðum með samskipti við börnin. Í lítilli rannsókn sem var gerð af V. Glover, K. Onozawa og A. Hodgkinson kom í ljós að nuddnámskeið hjálpaði slíkum mæðrum að tengjast börnum sínum nánar. Ekki er enn vitað hvers vegna þetta er en það er talið tengjast því að mæðurnar læri að þekkja þau merki sem börnin gefa frá sér.

Í rannsókn sem gerð var í Dómíníska lýðveldinu, á 2 - 8 ára börnum sem greinst höfðu með HIV veiruna kom í ljós að ef börnin voru nudduð komu þau betur út úr prófi sem mælir styrk ónæmiskerfisins, en börn sem ekki voru nudduð.

Í rannsókn sem Gail Ross gerði árið 1975 kom í ljós að því fleiri bleyjur sem feður ungbarna höfðu skipt um á þeim, því nánari tengsl voru á milli þeirra. Því má sjá hversu mikilvægt það er að snerta barnið og eyða tíma með því.